Арсим Зеколи- интелектуалец и дипломат кој ги надмина домашните рамки*

Ивон Величковски

Арсим Зеколи, личноста со интегритет, знаење и интелект што ги надмина домашните рамки. Северна Македонија од Зеколи добиваше одговор на најтешките прашања што се избегнуваа во функционерските кабинети и медиумските редакции. Ненаметливо, низ сликовит израз на длабински и добронамерен познавач и дипломат од светски размер.

Косово и Албанија од Зеколи добиваa погледи далеку вон внатре и меѓупартиските односи. Децениското следење на политичката, општествената и културната сцена од Алпите до Медитеранот го правеше неодминлив во регионалните медиуми. Без сопствен медиум, партија, лоби… само со Фејсбук профил и “јасна идеја која е поголема од секој од нас поединечно”, неговите зборови предизвикуваа бранови како камења фрлени во мирна вода.

За оние кои не се сеќаваат, огромен беше неговиот придонес за надминување на премрежјата на независноста и бегалската криза во 1990-тите – и за Македонците и особено за Албанците. За оние кои избраа да не се сеќаваат – тој беше прв шеф на мисија на ОБСЕ од нашата земја (во Туркменистан). На таа позиција дојде како наш претставник во организацијата во Виена во раните 2000-ти. Не преку лобирање и кампањи, туку како амбасадор од мала земја кој покажа како може и да ги застапува националните дипломатски приоритети – и да ги стави своите знаења и вештини во наддржавна корист.

А за мене лично – привилегијата да бидам еден од луѓето со кои беше во пријателска комуникација ќе ја искажам со: Miku im, do ta vazhdojmë bisedën tonë në një “Coffee House” atje. E di, një espresso të shkurtër për ambasadorin dhe një espresso të gjatë në një filxhan të madh për mua. И да, остануваме на идејата која е поголема од секој од нас поединечно. Më lejoni që, në emrin tim personal dhe në emër të Republika e Re, t’i shpreh ngushëllimet e mia të sinqerta familjes Zekolli.

* Насловот е на редакцијата