Девојка во Данска со детектор за метал пронашла 300 сребрени монети на древните Викинзи
Кај викиншката тврдина во северозападна Данска, откриени се речиси 300 сребрени монети стари повеќе од 1.000 години. Нив ги пронашла девојка со детектор за метал, пишува „Гардијан“.
„Вакво нешто е многу ретко“, изјави за АФП, Ларс Кристијан Норбах, директор на Историскиот музеј во Северен Јитланд, каде што ќе бидат изложени монетите. Сребрените монети се пронајдени на околу 8 километри од викиншката тврдина Фиркат, во близина на градот Хобро. Експертите кои ги испитувале мислат дека монетите датираат од 980-тите години.
Викинзите верувале дека по смртта ќе го најдат богатството што го закопале.
Музејот ќе ги изложи пронајдените монети во јули, а девојката што ги нашла ќе добие паричен надомест за наодот.
