|

ДВЕ ЛИЦА ОД ДЕБАР И ЕДЕН АЛБАНСКИ ДРЖАВЈАНИН ПОД ИСТРАГА ЗА МАРИХУАНА

Врз основа на вештачењата извршени по наредба на обвинителството и прибраните докази, надлежен јавен обвинител од Основното јавно обвинителство за гонење на организиран криминал и корупција, денеска издаде Наредба за спроведување на истражна постапка против еден албански државјанин и двајца дебарчани. Постои основано сомнение дека осомничените во текот на месец јули годинава, сториле кривично дело „Неовластено производство и пуштање во промет наркотични дроги, психотропни супстанции и прекурсори“ по чл.215 став 3 во врска со став 1 од Кривичниот законик.

Како што соопшти Јавното обвинителство, кривично правниот настан се случил во јули годинава кога првоосомничениот, 33 годишен албански државјанин, неовластено заради продажба на територијата на нашата држава внел наркотична дрога – марихуана од Република Албанија, со вкупна тежина од 5, 480 кг. Дрогата, била спакувана во јутена вреќа која, за да не биде откриен, ја сокрил во грмушка на место викано „Врабич“ на регионалниот пат Дебар – Струга. Тројцата осомничени на 20 јули 2020 година, околу 13. 30 часот со патничко моторно возило марка Голф, сопственост на еден од осомничените, дошле до местото каде била сокриена дрогата. Притоа, првоосомничениот излегол од автомобилот со намера да ја пронајде вреќата, додека другите двајца продолжиле во правец кон Струга. Додека првоосомничениот ја извлекувал вреќата со наркотичната дрога од грмушката бил забележан од полициски службеник и се дал во бегство. Во меѓувреме, двајцата дебарчани со цел да го земат првоосомничениот се вратиле на локацијата, но откако го виделе полицискиот службеник продолжиле кон Дебар каде биле запрени од полициски службеници и лишени од слобода. Обвинителството издало наредба за вештачења, меѓу кои и на траги од јутената вреќа во која се наоѓала дрогата.

Пристигнатите наоди од вештачењето покажуваат присуство на ДНК на двајцата осомничени и во корелација со другите докази ја даваат основата за издавање на Наредбата за спроведување на истражната постапка. Надлежниот јавен обвинител од Основното јавно обвинителство за гонење на организиран криминал и корупција, денеска до судијата на претходна постапка при Основниот кривичен суд – Скопје достави предлог за определување мерка притвор за осомничените.



Слични Објави