Светски познатиот бугарски писател Георги Господинов ја доби меѓународната книжевна награда „Виленица“
Бугарскиот писател Георги Господинов е добитник на престижната меѓународна книжевна награда „Виленица“, која традиционално се доделува во едноимената пештера во Словенија, информира издавачката куќа „Жанет 45“.
Господинов стана 40-тиот лауреат на овој значаен фестивал, кој оваа година се одржа од 8 до 13 септември под мотото „Прекрасниот нов свет“.
„Литературата и сториите имаат животоспасувачка сила и можат да го сочуваат човечкото“, изјави Господинов при доделувањето на наградата.
Наградата „Виленица“ се доделува на централноевропски автори за исклучителни достигнувања во областа на литературата и есеистиката. Меѓу досегашните добитници се големи имиња како Милан Кундера, Олга Токарчук и Дубравка Угрешиќ.
