Трамп откри дека Зеленски му испратил писмо: подготвен е за мировни преговори

Претседателот на Соединетите Американски Држави, Доналд Трамп, во своето обраќање пред Конгресот откри дека украинскиот претседател Володимир Зеленски му испратил писмо во кое изразува подготвеност да преговара за мир и да потпише договор за минерали.

„Во писмото се наведува дека Украина е подготвена да седне на преговарачка маса што е можно поскоро за да се доближи до траен мир и дека никој не сака мир повеќе од Украинците. Зеленски исто така напиша дека тој и неговиот тим се подготвени да работат под силното водство на претседателот Трамп со цел да се постигне траен мир.

„Тој, исто така, пренесе дека ја цени американската помош за Украина за зачувување на нејзиниот суверенитет и независност“, рече Трамп.

Американскиот претседател откри и дека имал сериозни разговори со Русија од кои, како што рече, добил силни сигнали дека е подготвена за мир. „Време е да се запре ова лудило, да се запрат убиствата и да се стави крај на бесмислената војна. Ако сакате да ставите крај на војните, треба да разговарате со двете страни“, рече Трамп.