Шефицата на бугарската дипломатија ќе учествува во Советот за надворешни работи на ЕУ во Брисел
Министерката за надворешни работи на Бугарија Велислава Петрова ќе учествува во Советот за надворешни работи на 11 мај 2026 година во Брисел, соопштија од прес-центарот на бугарското Министерство за надворешни работи, пренесува БГНЕС.
Во рамките на состанокот ќе биде одржана дискусија за продлабочување на соработката со земјите од Западен Балкан во областа на заедничката надворешна и безбедносна политика. Министрите ќе разговараат и за ситуацијата на Блискиот Исток, при што фокусот ќе биде ставен на соработката на ЕУ со државите од Советот за соработка во Персискиот Залив.
Во контекст на руската агресија врз Украина, шефовите на дипломатиите на ЕУ ќе стават акцент на постигнатиот напредок во клучните области на поддршката што Унијата ѝ ја обезбедува на Украина, како и на геостратешкото значење на пристапувањето на земјата во ЕУ.
