Во Скопје е отворен првиот во земјата Центар за дневна грижа за деца и млади до 26 години, поддржан и преку програмата Бугарска помош за развој

Центар за дневна грижа за деца и млади со попреченост до 26 години беше отворен во Скопје во присуство на претседателката на државата Гордана Сиљановска, донаторите – амбасадорот на Бугарија во Северна Македонија Желјазко Радуков, претставници на Светската банка и фондацијата „Мехаџиски“, јавува БТА. Центарот е прв од таков вид во Северна Македонија. Изградбата на центарот, кој се наоѓа во скопската општина Ѓорче Петров, е поддржана со 106.324,80 евра преку програмата Бугарска помош за развој, а Сиљановска изрази посебна благодарност до бугарската држава и амбасадата на земјата во Скопје за поддршката, за која нагласи дека не е прва што бугарската држава ја дава за вакви проекти. Здружението „Во мојот свет” му врачи на амбасадорот Радуков, како и на останатите донатори, благодарница.

Претставници на Здружението за поддршка и лекување на лица со нарушувања од аутистичниот спектар и атипичен развој им ја покажаа на присутните реновираната и адаптирана за работа со лица со специфични потреби поранешна општинска зграда. Во рамки на дневниот центар, чиј капацитет е до 24 адолесценти и млади на возраст од 14 до 26 години и можност за индивидуална работа со 20 деца до 14 години, покрај простории за индивидуална работа има и простории за различни креативни активности.

Целта на здружението „Во мојот свет” е да обезбедува професионална, континуирана и индивидуализирана поддршка, насочена кон развој на функционални вештини, социјализација и подобрување на квалитетот на живот на лицата со попреченост и нивните семејства, при што услугите се бесплатни за децата и младите со специфични потреби.