КЦ „Иван Михајлов“ до премиерот Мицкоски: Време е да им ја кажете вистината на граѓаните

Забранетиот бугарски Културен центар ,,Иван Михајлов”- Битола преку отворено обраќање, објавено на социјалната мрежа Facebook, го повика премиерот Христијан Мицкоски да им ја каже вистината на граѓаните. Во продолжение ви го пренесуваме обраќањето на КЦ ,,Иван Михајлов “ -Битола во целина и без уредничка интервенција:

ОТВОРЕНО ОБРАЌАЊЕ НА КУЛТУРНИОТ ЦЕНТАР „ИВАН МИХАЈЛОВ“ – БИТОЛА ДО ПРЕМИЕРОТ ХРИСТИЈАН МИЦКОСКИ: ВРЕМЕ Е ДА ИМ ЈА КАЖЕТЕ ВИСТИНАТА НА ГРАЃАНИТЕ

Со години властите во Скопје го убедуваат општеството дека Бугарите во Република Северна Македонија не постојат, дека нивното впишување во Уставот е бугарски диктат, дека Договорот за добрососедство е непотребен и дека Европската Унија никогаш не поставила такви услови.

Сега, во Годишниот извештај за напредокот на земјата, Европскиот парламент ја побива оваа пропаганда.

Истата Европска Унија, зад чии „експерти“ властите во Скопје со години се кријат, јасно изјавува дека Бугарите треба да бидат впишани во Уставот како рамноправна државотворна заедница. Ова веќе не е позиција на Бугарија. Ова е официјална позиција на Европскиот парламент.

Особено показателно е лицемерието околу таканаречениот План за заштита на етничките заедници. Тој беше претставуван како европски модел, изготвен со учество на експерти од ЕУ, а денес токму Европскиот парламент констатира дека заштитата на правата на заедниците останува недоволна и дека Северна Македонија треба да преземе конкретни мерки за гарантирање на рамноправноста. Тоа е признание за неуспехот на политиките што властите со години ги претставуваат како „успешни“.

Извештајот содржи и други непријатни вистини што власта внимателно ги премолчува.

Европскиот парламент бара веднаш да биде обновена работата на Заедничката мултидисциплинарна комисија за историски и образовни прашања меѓу Бугарија и Северна Македонија. Тој нагласува дека историските факти треба да се засноваат на автентични документи и научни докази, а не на политички митови. Го осудува уништувањето на историски споменици и изразува жалење за уништувањето и фалсификувањето на бугарски натписи.

Европскиот парламент бара и целосно спроведување на Договорот за пријателство, добрососедство и соработка меѓу Бугарија и Северна Македонија, како и на сите негови протоколи.

Уште попоказателно е тоа што Европскиот парламент предупредува на засиленото српско влијание во Северна Македонија, на ширењето на идеологијата за таканаречениот „Српски свет“, како и на руското и кинеското влијание во регионот. Тоа се предупредувања што со години беа отфрлани како „бугарска пропаганда“, а денес се официјално запишани во документ на Европскиот парламент.

Извештајот содржи и еден исклучително важен повик — архивите на југословенските тајни служби УДБА и КОС да бидат отворени и во Северна Македонија и во Србија. Тоа е признание дека без откривање на вистината за репресиите, политичките прогони и механизмите на југословенскиот комунистички режим, не може да има вистинска демократија и владеење на правото.

Сето ова покажува едно.

Проблемот никогаш не бил во Бугарите. Проблемот е во одбивањето на институциите во Северна Македонија да ја признаат реалноста, да гарантираат еднакви права на сопствените граѓани и да ги исполнат преземените европски обврски.

Најпарадоксално е тоа што денес властите се повикуваат на „европски експерти“ кога тоа им одговара, но ги отфрлаат официјалните заклучоци на Европскиот парламент кога тие не се совпаѓаат со нивната внатрешнополитичка пропаганда.

Вистината е едноставна.

Она што со години беше претставувано како бугарски барања, веќе е официјална европска политика.

Колку подолго властите во Скопје одбиваат да ја прифатат оваа вистина, толку повеќе ја оддалечуваат земјата од Европската Унија и толку потешки ќе бидат последиците за сите нејзини граѓани, вклучително и за македонските Бугари, кои продолжуваат да бидат лишувани од целосна рамноправност во сопствената држава.