Сè поголем интерес за бугарските зимски центри, Банско и Боровец меѓу најбараните

Засега изгледите за успешна зимска сезона се добри, а бугарските зимски одморалишта привлекуваат сè повеќе странски туристи, пишува Actualno.com.

Според туроператорите, најактивни се пазарите од Балканот, Велика Британија и Израел, а меѓу најпосакуваните дестинации остануваат Банско и Боровец.

Банско е подготвено да ги пречека љубителите на зимските спортови и скијањето. На улиците на гратчето засега е тивко и мирно, но сликата ќе се промени за само неколку недели. Раните резервации бележат двоцифрен раст, а туристичкиот сектор се подготвува за еден од најфреквентните периоди во годината.

„За божиќните празници сме целосно пополнети. Сместувачките капацитети веќе се резервирани. Можеби кон крајот на октомври, поточно уште кон средината на октомври, сите места беа распродадени“, вели Митко Колев, менаџер на спа-комплекс во Банско.

Сè уште има можност да се најде слободно место во одморалиштето за новогодишните празници, но само ако се побрза.

„За Нова година сè уште има слободни места, но има и време, а луѓето подолго ги разгледуваат понудите. Минатата година, колку што се сеќавам, поточно оваа година, Банско беше исклучително полно. Јас лично никогаш не сум видел толку луѓе во Банско за новогодишните празници“, вели Колев.

Интерес и од конкурентските земји

Покрај традиционалниот интерес на туристите од Источна и Централна Европа, годинава туристичкиот сектор бележи изненадувачки интерес и од земји што се водечки светски дестинации за скијачки туризам.

„Неодамна нè посетија туроператори од Франција, кои размислуваат да го понудат Банско како алтернатива за француските туристи што сакаат да пробаат нешто поинакво, нешто ново, па затоа ја избираат Бугарија како дестинација. Голем интерес има и од Полска, односно од полските туристи“, посочува Колев.

Во средината на декември може да се најде викенд-аранжман за двајца возрасни и две деца по цена од 150 до 500 евра, во зависност од сместувањето, исхраната и спа-услугите на хотелот. Така, и покрај зголемениот интерес за одморалиштето, цените остануваат на минатогодишното ниво.

„Во оваа фаза не се предвидува зголемување на цените до крајот на зимската сезона. Сите колеги веќе ги објавија цените. Имаме поединечни акции, како што се ‘црн петок’, други промотивни понуди, рани резервации и слично, така што понудите се насочени кон поповолни услови за гостите“, вели Колев.

Безбедноста на туристите во текот на зимската сезона е меѓу приоритетите на локалната власт во Банско. Затоа, оваа недела на Пирин се одржа голема тактичка вежба за пребарување и спасување при воздухопловна несреќа.

„Уверен сум дека туристите ќе бидат во безбедна средина поради искуството што го имаме од претходните сезони. Низ годините ја следевме подготвеноста на сите овие институции и нивните тимови и се уверивме во професионалноста на сите. Со нетрпение ја очекуваме зимската сезона. Луѓето ќе бидат безбедни и ќе можат целосно да уживаат во престојот во Банско“, вели градоначалникот на Банско, Стојчо Баненски, цитиран од bTV.