Адмирал Ефтимов: Бугарија има капацитет за развој на европската одбранбена индустрија
Бугарија располага со значителен капацитет за развој на европската одбранбена индустриска база, изјави началникот на одбраната адмирал Емил Ефтимов на состанокот на Воениот комитет на НАТО во Брисел, соопшти бугарското Министерство за одбрана.
Ефтимов нагласи дека влошената безбедносна средина претставува сериозен предизвик за сојузниците, но преку координирани активности, развој на нови способности и зајакнување на одбранбената индустрија, НАТО ќе ја зацврсти својата улога како гарант на безбедноста и меѓународниот поредок.
Тој ги истакна предизвиците за земјите од Источното крило на Алијансата и ја подвлече важноста на заедничкото финансирање за воена мобилност, проширување на НАТО-системот за снабдување со гориво и поддршка за мултинационалните сили. Ефтимов ја поддржа и новата командно-управувачка структура на НАТО, вклучително и формирањето штаб на мултинационална дивизија во Бугарија.
Генералниот секретар на НАТО, Марк Руте, на форумот ја нагласи потребата од зголемување на капацитетот на одбранбената индустрија и изнаоѓање рационални решенија за современите предизвици. Ефтимов предложи во овие процеси да бидат вклучени и компании од одбранбената индустрија на земјите од Источното крило, истакнувајќи дека Бугарија има можности да придонесе во рамките на НАТО и ЕУ.
