Бугарски компании од одбранбената индустрија беа претставени во Европскиот парламент
Девет бугарски компании од одбранбената индустрија беа претставени во Брисел на настан што се одржа во Европскиот парламент по иницијатива на европратеникот Андреј Новаков. Настанот ја надградува делегацијата на европратеници, предводена од Новаков, која во јули годинава ја посети Бугарија, и на која присуствуваа двајца еврокомесари, јавува БГНЕС.
Бугарските компании ги презентираа своите производи и активности во рамки на форумот, кој опфати и индустриски претставници од Полска, Хрватска, Чешка и Словачка. Специјални гости на конференцијата беа Екатерина Захариева, еврокомесар за стартапи, научни истражувања и иновации, како и еврокомесарот за одбрана Андриус Кубилиус. Настанот се одржа зад затворени врати и вклучи дискусија со експерти од Европската агенција за одбрана и од Генералната дирекција за „Одбранбена индустрија и вселенски простор“ на Европската комисија.
„Успеавме да собереме 30 компании од Централна и Источна Европа, од кои една третина беа бугарски. Целта е координација, позиционирање и заштита на нашите интереси во Брисел“, изјави Новаков. Тој нагласи дека во Бугарија постојат исклучително успешни производители на муниција, оружје, беспилотни летала, сателити, пловни објекти, софтвер и решенија за сајбер-безбедност, оптика и анти-дрон системи, кои се „визит-карта на земјата и ’рбет во одбраната на источниот фланг на НАТО и Црноморскиот регион“.
Меѓу бугарските компании претставени во Европскиот парламент беа: „Самел-90“, „Арсенал“, „МТГ – Делфин“, „ОПТИКС“, „Дунарит“, EnduroSat, Dronamics, Wiser Technology и Kontrax.
Андреј Новаков е единствениот бугарин кој е полноправен член на Комисијата за одбрана и безбедност во Европскиот парламент. Неговата работа е насочена кон развој на одбранбени капацитети, финансирање и дерегулација на индустријата, воена мобилност и заштита на критичната инфраструктура. Во октомври годинава, тој беше автор и преговарач на резолуцијата на Европскиот парламент за инцидентите со дронови во воздушниот простор на Унијата.
