Кралот Чарлс ја одложи државната посета на Ватикан додека папата закрепнува
Кралот Чарлс III и кралицата Камила ја одложија државната посета на Ватикан, која беше закажана за почетокот на април, додека папата Франциско закрепнува по повеќе од пет недели во болница, соопшти Бакингемската палата.
Одлуката е донесена во консултација со Светата столица, соопшти палатата, повикувајќи се на „медицински совети“ дека на папата Франциско му треба подолг период на одмор и закрепнување.
Кралот Чарлс и кралицата му посакаа на папата „успешно закрепнување и со нетрпение очекуваат да го посетат“ во Ватикан кога ќе закрепне, се додава во соопштението од Лондон.
Посетата на кралот и кралицата на Италија ќе продолжи според планираното од 7-ми до 10-ти април. Тие треба да бидат примени од претседателот Серџо Матарела и премиерката Џорџа Мелони. Чарлс (76) ќе биде „првиот британски монарх што ќе се обрати на седница на италијанскиот парламент“, додаваат од палатата.
Папата се врати во Ватикан по повеќе од пет недели хоспитализација поради билатерална пневмонија и се очекува дека ќе му биде потребен период од два месеци за да може да продолжи со своите должности.
