Невидена донаторска акција за Благоевград! За два дена 200 луѓе дадоа крв за повредените во Кочани

Акцијата за дарување крв за македонските младинци кои беа повредени во пожарот во дискотеката Пулс во Кочани е без преседан за Благоевград, јавуваат од МБАЛ Благоевград, пренесува весникот „Струма“.

„Во последните два дена даруваа крв околу 200 луѓе. Бројот на оние кои сакаат да даруваат крв е исклучително голем. Првиот ден работевме до 16 часот, при што 80 луѓе даруваа крв за децата од Северна Македонија, а другите 20 беа роднини на болни кои се пред операција.Денеска работевме до 14 ч. и 100 луѓе дадоа крв. Моравме да ги вратиме луѓето затоа што ни снемаа банки за чување на крвта и испратив брза помош во Софија за нови. Собрана е доволно крв, но луѓето продолжуваат да доаѓаат. Ова е најголемата кампања откако работам во Банката за крв. Во мојата пракса, никогаш не сум видел толку многу луѓе што сакаат да даруваат крв. Слична акција за дарување крв имаше и при експлозијата на гас во рудникот Ораново во 2007 година, кога имаше жртви и повредени, но и таа бледнее во однос на сегашната“, изјави за „Струма“ раководителот на одделението за трансфузиона хематологија во МБАЛ – Благоевград, д-р Бојка Маринова.

Таа прецизира дека Центарот за крв е отворен од 07:30 до 13:30 часот, а кампањата ќе продолжи уште неколку дена.