Нови тензии: Северна Кореја лансира крстосувачки ракети, тврди Сеул

Северна Кореја лансира повеќе крстосувачки ракети во морето во близина на својот западен брег, соопшти утринава Јужна Кореја, како најнов знак за зголемени тензии на Корејскиот Полуостров, пренесува „Ројтерс“.

Ракетите биле лансирани околу 7 часот, а следеле јужнокорејските и американските разузнавачки служби.

Последното лансирање на ракета од Пјонгјанг дојде додека единицата за специјална војна на јужнокорејската морнарица беше ангажирана на обука по должината на источниот брег во провинцијата Гангвон, која граничи со Северна Кореја.

Обуката имаше цел да ја зајакне оперативната подготвеност по неодамнешниот артилериски оган на Северна Кореја во близина на спорната поморска граница и тестирање на оружје, соопшти јужнокорејскиот јавен сервис.

Пјонгјанг соопшти дека тестирал хиперсонична ракета со среден дострел со цврсто гориво на почетокот на овој месец, потег што го осудија САД, Јужна Кореја и Јапонија.

Изолираниот Север исто така урна голем споменик во својот главен град, што ја симболизира целта за помирување со Јужна Кореја по налог на лидерот Ким Џонг-ун, кој минатата недела го нарече ривалот „примарен непријател“ и рече дека обединувањето повеќе не е можно.