НСИ: Бугарите најчесто патуваат до Турција и Грција
Во јуни 2025 година, патувањата на бугарски државјани во странство достигнале 943,6 илјади, што претставува пораст од 10,4% во споредба со истиот месец минатата година, покажуваат податоците на Националниот завод за статистика (НСИ), јавува БГНЕС.
Зголемување е забележано кај сите категории патувања – за одмор и екскурзии, службени патувања и патувања со други цели. Најпосетувани дестинации од страна на Бугарите биле: Турција (246,1 илј.), Грција (219,8 илј.), Романија (91,5 илј.), Германија (64,6 илј.), Србија (60,7 илј.), Италија (34,3 илј.), Австрија (30,3 илј.), Северна Македонија (27,8 илј.), Шпанија (25,9 илј.) и Франција (24,9 илјади).
Најголем дел од патувањата се остварени со цел одмор и екскурзија – 42,9%, следат патувањата со други цели (41,1%) и службените патувања (16%).
Од друга страна, во јуни 2025 година бројот на посети на странски државјани во Бугарија изнесувал 1.426,8 илјади, што е намалување од 3,1% во однос на јуни 2024 година. Забележан е пад од 9,3% на службените патувања и 4,8% на посетите за одмор и екскурзија, додека посетите со други цели се зголемиле за 0,5%. Транзитните преминувања низ земјата сочинуваат 31,4% (448,2 илј.) од сите посети на странци.
Граѓаните на Европската унија сочинуваат 56,6% од сите посетители (808,3 илј.), при што најмногу туристи дошле од Романија (30,0%), Германија (16,9%), Грција (13,0%) и Полска (11,7%).
Од групата „Други европски земји“ регистрирани се 544,3 илјади посети (38,1% од вкупниот број), од кои најмногу од Турција – 239,3 илјади (44% од оваа група).
Најмногу посети во Бугарија реализирале граѓани од: Романија (242,2 илј.), Турција (239,3 илј.), Германија (136,5 илј.), Украина (134,1 илј.), Грција (105,3 илј.), Полска (94,3 илј.), Србија (73,9 илј.), Обединетото Кралство (42,5 илј.), Чешка (41,0 илј.) и Северна Македонија (29,4 илјади).
Кај странските посетители доминираат патувањата за одмор и екскурзија – 52,4%, потоа следуваат посетите со други цели (39,9%), а најмал удел имаат службените патувања – 7,7%.
