ОБСЕ самит во Скопје: Институциите утврдија – неправилности нема

Обвинувањата за наводни злоупотреби при организацијата на Министерскиот совет на ОБСЕ во Скопје во 2023 година се институционално затворени уште минатата година, потврдија Државната комисија за спречување на корупција (ДКСК) и Јавното обвинителство за гонење организиран криминал и корупција (ОЈО ГОКК).

Според нивните заклучоци, постапката за избор на компанија за реконструкција и адаптација на салата „Борис Трајковски“ била спроведена согласно важечките закони и критериуми за фер и транспарентно оценување, без утврдени елементи на корупција.

Проверката започна по иницијатива на тогашниот министер за надворешни работи Бујар Османи, кој, по серија јавни обвинувања, побара ревизија и целосна истрага за постапката.

„Процесот се одвиваше во согласност со законската рамка и не се утврдија коруптивни елементи“, стои во заедничкиот заклучок на ДКСК и Обвинителството.