Отворен бугарско-украински центар на Централноукраинскиот национален технички универзитет

Бугарско-украински центар беше отворен на 18 декември на Централноукраинскиот национален технички универзитет во обласниот центар на Кировоградската област, пренесува БНР. Официјални гости на настанот беа вршителката на должноста раководител на Амбасадата на Бугарија во Украина, Елена Слатинска-Ованезова, и генералниот конзул во градот Одеса, Светослав Иванов.

Домаќинот на меѓународниот настан, проф. Володимир Кропивниј, ректор на универзитетот, ги поздрави официјалните гости – бугарските дипломати, и во нивно име ѝ се заблагодари на Бугарија за воената и економската помош за Украина.

„Многу се радувам што во Кропивницки, во Кировоградската област, каде што се наоѓа едно од најстарите населувања на Бугарите на територијата на современа Украина од 1774 година, се отвора ваков бугарско-украински центар, кој ќе го означи почетокот на проширувањето на нашата соработка. Нашата соработка не е само во областа на економијата, образованието и културата. Со Украина имаме многу добра академска размена и се надевам дека ќе можеме да ја прошириме оваа научна и академска размена и со универзитетот во градот Кропивницки“, изјави во своето обраќање Елена Слатинска-Ованезова.

Предавање на тема „Популаризацијата на бугарско-украинските врски од VII до XXI век“ одржа проф. Михаил Станчев, доктор на историски науки и странски член на Бугарската академија на науките.

Настанот е дел од одбележувањето на 15-годишнината од основањето на Кировоградското обласно бугарско друштво „Нашите луѓе“, пренесува БТА.