ПРЕТСТАВАТА „ЧОВЕК, ЅВЕР И ДОБЛЕСТ“ ВО ТЕАТАР „КОМЕДИЈА“ ВО РЕЖИЈА НА ЕГОН САВИН

АКТУЕЛНОПретставата „Човек, ѕвер и доблест“ во режија на Егон Савин во Театар „Комедија“Објавено пред 17 часа – 20 декември, 2019Од Макфакс

Театар „Комедија“ ја најавува премиерата на претставата „Човек, ѕвер и доблест“, во режија на Егон Савин. Култниот режисер од Факултетот за драмски уметности во Белград ја затвора сезоната во Театар „Комедија“ со претстава на Луиџи Пирандело.

Во врска со приказната на претставата, од Театар „Комедија“ објаснуваат дека Пирандело пишувал долго време поминувајќи ги сите фази од натурализам, преку експресионизам и футуризам до авангарда.

„Но, во сите свои дела тој секогаш се занимава со кризата на моралот. Лагата и лицемерството во меѓучовечките односи е невозможно да се измерат. Не постои човек што барем еднаш не посегнал по лагата за да ги прикрие своите пороци и слабости. Пиранделовата лична и литерарна слобода се состои во тоа да ги именува нештата со нивното вистинско име. Во современиот театар има изобилство претстави што зборуваат за човекот конфронтиран со тиранијата на власта, на полицијата, на војската, бирократијата…

Но, што кога човекот е загрозен од страна на своите сакани, од оние што му се најблиски? Семејната драма е најболна драма. Секогаш неочекувана, никогаш отворена, секогаш мимикрирана, маскирана со ритуалите на семејниот живот. Понекогаш оваа игра носи маска на пријателство, нежност, еротска љубов, грижа и пожртвуваност… Овие маски, овие ритуали на секојдневниот живот, им овозможуваат на луѓето колку-толку поднослив живот, без крв. По одредено време таквиот живот резултира со презир и омраза кон себеси, резултира со меланхолија, со лудило“, се вели во најавата на претставата.

Режисерот Егон Савин е редовен професор на катедрата за режија при Факултетот за драмски уметности во Белград.

Тој има режирано стотина претстави во сите значајни театарски куќи од цела поранешна Југославија, како и во Унгарија и Италија. Неговите претстави се играат насекаде во светот, а добитник е и на голем број домашни и меѓународни награди за режија.

Претставата „Човек, ѕвер и доблест“ му е трета режија во Македонија. Во средината на деведесеттите години Савин работеше на претставите „Злосторство и казна“ (Достоевски) и „Лаж и паралаж“ (Стерија), поставени во МНТ во Скопје.

Од Тетатар „Комедија“ најавуваат дека за претставата „Човек, ѕвер и доблест“ веќе има голем интерес и ќе биде на редовниот репертоар, а билетите за претпремиерата и премиерата на 23 декември се веќе распродадени.

Улоги
Професор Паолино – Атанас Атанасовски
Морнар Перела – Сашо Ристовски/Тони Денковски
Госпоѓа Перела – Сашка Димитровска
Доктор Нино Пулејо – Жарко Димоски
Аптекар Тото – Жарко Димоски
Слугинка Розарија – Кристина Ласовска
Ученик Џиљо – Тони Денковски
Слугинка Грација – Жаклина Стевковска-Дрнасин
Ноно, 11-годишен син на Перела – Ева Скендеровска

Креативен тим
АВТОР: ЛУИЏИ ПИРАНДЕЛО
РЕЖИЈА: ЕГОН САВИН
СЦЕНОГРАФИЈА: ВЕСНА ПОПОВИЌ
КОСТИМОГРАФИЈА: ЕЛЕНА ДОНЧЕВА
АСИСТЕНТ НА КОСТИМОГРАФ: ИВАНА КАРАНФИЛОВСКА-УГУРОВСКА
ИЗБОР НА МУЗИКА: ЕГОН САВИН
АДАПТАЦИЈА НА ТЕКСТ: ЕГОН САВИН
ПРЕВОД: ЉУПЧО ПЕТРУШЕВСКИ
ЛЕКТОР: ЗОРИЦА МАНАСКОВА
СТРУЧЕН КОНСУЛТАНТ : ПЕТАР АРСОВСКИ
ДИЗАЈН НА ПЛАКАТ: СЕРГЕЈ СВЕТОЗАРЕВ