Радев: Внесувањето на Бугарите во Уставот на РСМ е клучно за забрзувањето на европскиот пат на државата
Внесувањето на Бугарите во Уставот на Република Северна Македонија значително ќе го забрза европскиот интегративен процес на земјата, изјави бугарскиот претседател Румен Радев на средба со претставници на организации на бугарската заедница од РСМ, одржана вчера во претседателската институција во Софија. На разговорот присуствуваа претставници од Битола, Охрид, Скопје, Прилеп, Кавадарци и Кочани, јавува прес-службата на бугарскиот претседател.
Радев нагласи дека секоја демократска држава има должност да ги штити правата на сите свои граѓани и да го гарантира нивното право на самоопределување. Тој потсети дека интеграцијата на Северна Македонија е заедничка желба, но не може да се реализира доколку правата на бугарската заедница во земјата не се почитуваат. Во тој контекст, шефот на бугарската држава изрази очекување властите во Скопје што поскоро да го исполнат Европскиот компромис од 2022 година и да ги впишат Бугарите во Уставот.
Претставниците на бугарските организации предупредија дека РСМ не смее да ја користи бугарската заедница како изговор за одложување на потребните реформи поврзани со европските интеграции. Тие се изјаснија против какви било уставни измени со одложено дејство или дополнителни услови, бидејќи се работи за основни човекови права. Притоа, тие истакнаа дека како лојални граѓани очекуваат институциите во Скопје да им обезбедат еднаквост и ефективна заштита од дискриминација.
На средбата беше изразена загриженост и во врска со тековниот процес во Скопје за изработка и усвојување на Акцискиот план за заштита на правата на заедниците – клучна обврска преземена со Европскиот компромис. Претставниците посочија дека не биле вклучени во подготовката на документот од самиот почеток и дека добиле минимален рок за да достават мислења и предлози.
Тие упатија апел до медиумите во Бугарија да обрнуваат внимание не само на најострите случаи на притисоци и инциденти, туку и на културните и општествените активности на бугарската заедница во РСМ, кои имаат значење за луѓето од двете страни на границата. Претставниците ја истакнаа и важноста на тоа Бугарија да охрабри повеќе млади од Северна Македонија да студираат во бугарските универзитети, што ќе придонесе за унапредување на контактите меѓу младите генерации во двете земји.
