Рочишта за предметите „Труст“ и „Тенк“
Во Кривичниот суд за денеска се закажани рочишта за предметите на СЈО, „Труст“ и „Тенк“, јавува Радио Слободна Европа. На рочиштето за „Тенк“ треба да бидат слушани разговорите со коишто располага СЈО, а исто така треба да бидат сослушани тројца сведоци на обвинението. Ќе се презентираат и други материјални докази. Во предметот „Тенк“ на СЈО обвинети се поранешниот премиер Никола Груевски, поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски, за набавката на луксузниот „мерцедес“ од 600 илјади евра. Судско рочиште е закажано и за предметот „Труст“ во кој првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ, за учество на тендер на Електрани на Македонија. Според обвинението, осомничените местеле тендери во ЕЛЕМ во вредност од 17 милиони евра.
