Во БКИЦ се одржа првата средба на државјани на Република Северна Македонија, кои дипломирале во Бугарија

Во Бугарскиот културно-информативен центар во Скопје синоќа се одржа првата средба на дипломирани студенти на бугарските универзитети кои се државјани на Република Северна Македонија, јавува БТА.

„Голем број граѓани на Република Северна Македонија своето високо образование го завршиле во Република Бугарија на универзитетите и високообразовните институции, вкупно 52 на број, од основањето на најстарата високообразовна институција во Бугарија – Универзитетот „Св. Климент Охридски“ во 1888 г. Секоја од овие институции е горда на своите дипломци кои го реализирале своето знаење и потенцијал во сите области од јавниот живот каде било во светот, вклучително и во Република Северна Македонија. Меѓу нив има научници, писатели, наставници, предавачи, новинари, адвокати, лекари, луѓе од различни области на уметноста, истражувачи, државници итн. Стотици, па и илјадници луѓе кои надвор од рефлекторите придонесуваат за развојот не само на Бугарија и Република Северна Македонија, туку и на многу други земји“, рече Илијана Атанасова, директорка на бугарското училиште „Здравеј“ и еден од иницијаторите за создавање на Алумни асоцијацијата „БГ УНИ“, чија цел е да ги зајакне врските и комуникацијата помеѓу универзитетите, нивните дипломирани студенти, сегашните студенти и работодавачите, да воспостави ефикасна врска помеѓу високото образование и бизнисот.

Активноста на Здружението „БГ УНИ“ е поврзана со споделување на професионално искуство, менторство за сегашните студенти, нудење програми за практикантска работа и партнерства во рамките на различни проекти.

Средбата беше и еден од последните настани со учество на актуелниот амбасадор на Бугарија во Република Северна Македонија, Ангел Ангелов, чиј мандат наскоро завршува, кој им честиташе на присутните од различни генерации кои дипломирале во Бугарија.

„Оваа идеја ја имаме долго време. Тоа го направивме со дипломираните студенти на НСА, сега собираме луѓе од различни образовни институции, бидејќи овие хоризонтални контакти се важни. Комуникацијата со луѓе од различни професии го проширува хоризонтот на размислување. Се надевам дека околу празникот на студентите, 8 декември, ќе можеме да организираме уште една средба со идниот амбасадор на Бугарија во Северна Македонија, на кого му ја пренесов оваа идеја“, рече амбасадорот Ангелов.

„Мило ми е што ги задржавте топлите чувства од студентските години во Бугарија. Бугарија продолжува да биде позната по доброто образование, гледам луѓе кои успешно се реализирале и верувам дека ние сме мостот за зближување на нашите две општества. Би сакала вакви средби да се одржуваат не еднаш годишно, туку барем еднаш месечно“, изјави директорката на Бугарскиот културно-информативен центар во Скопје, Антонија Велева.

Здружението „БГ УНИ“ сега има своја веб-страница, преку која оние кои го завршиле своето високо образование во Бугарија можат да се регистрираат за да станат дел од заедницата, чија една од целите е да помогне во развојот на различни идеи на национално и меѓународно ниво, преку иницијативи и проекти, како еден вид интелектуален и образовен мост меѓу Бугарија и Северна Македонија.