Во бугарскиот парламент беа одбележани 35 години од донесувањето на Уставот од 1991 година

Претседателката на 52-то Народно собрание на Бугарија, Михаела Доцова, отвори изложба посветена на создавањето на Уставот од 1991 година.

Поставката, сместена во Мермерното фоаје на Народното собрание, содржи документи и фотографии од процесот на изработка и усвојување на основниот закон на Република Бугарија.

Во рамките на одбележувањето, во парламентот се одржува и дискусија на тема „35 години модерен Устав“. На тркалезната маса учествуваат пратеници од Седмото големо народно собрание, како и поранешни и актуелни пратеници.

Отворајќи го настанот, Доцова истакна дека благодарение на Уставот, Бугарија денес располага со утврдени демократски вредности, независна судска власт и јасна поделба на законодавната, извршната и судската власт.

„Секоја година има политичко спротивставување. Секоја година се води тежок дијалог за тоа во која насока треба да продолжи Бугарија, но благодарение на мудроста и државничкото размислување на секој поединец, овој камен-темелник, оваа основа, овој Устав продолжува да биде столбот на современата бугарска држава“, изјави претседателката на Народното собрание, Михаела Доцова.

Во текот на дискусијата ќе бидат разгледани значењето на Уставот од 1991 година, неговиот развој во изминатите 35 години и неговата улога во зацврстувањето на демократските институции во Бугарија.