Во Варна одбележани 114 години од историската победа на бугарската морнарица над османлискиот крстосувач „Хамидие“

Во Варна, Бугарија, беше одбележана 114-годишнината од торпедниот напад врз османлискиот крстосувач „Хамидие“, една од најзначајните победи во историјата на бугарската воена морнарица, јавува Армимедија.

На 8 ноември 1912 година, за време на Балканската војна, четири бугарски торпедни брода – „Летјашти“, „Смели“, „Строги“ и „Дрзки“, под команда на капетанот Димитар Добрев, го нападнале османлискиот крстосувач „Хамидие“, нанесувајќи му сериозни оштетувања.

Командантот на Военопоморската база во Варна, капетан Борислав Великов, истакна дека успехот бил резултат на внимателно планирана операција, добра подготовка и искористување на моментот на изненадување.

„Нападот не бил случаен настан, туку добро подготвена операција. За нас, воените морнари, поуката е дека духот и подготовката се предуслов за успех на море“, изјави Великов.

Победата над „Хамидие“ се смета за значаен момент во развојот на бугарската морнарица, која во тоа време располагала со ограничени сили и борбено искуство.

Торпедниот брод „Дрзки“, кој го извел решавачкиот напад, од 1957 година е дел од поставката на Военопоморскиот музеј во Варна.

По повод годишнината, пред споменикот на капетан Димитар Добрев беа положени цвеќиња во знак на почит кон учесниците во историската операција.