11-годишната Дијана Бозова од Златоград е меѓу 100-те најталентирани деца во светот

Нејзиниот цртеж на Панаѓурското богатство беше избран за амблем на меѓународен натпревар

11-годишната Дијана Бозова е меѓу 100-те најталентирани деца во светот. Ученичката од Златоград е добитничка на голем број престижни награди и дипломи, што и дава место на престижно рангирање со нејзините врсници од целата планета. Ова за „Бугарија Денес“ го изјави Маја Ананиева од уметничкото училиште „Колорит“ во Плевен, која три години е учителка на девојчето.

Еден од последните успеси на Дијана е со цртежот на Панаѓурското Златно богатство. Делото е избрано за амблем на 12-от меѓународен натпревар за детски слики „Голешти 2022“ на тема „Богатствата на мојата земја“, организиран од светски познатиот музеј во романското село Голешти. Нејзиното дело е испечатено на сертификатите на победниците и ја краси веб-страницата на музејот. Младата девојка добива и Почесна награда за достигнувања.

„Дијана е неверојатно дете кое е исклучително талентирано и црта со инспирација. Нејзините сетила се отворени кон светот и тоа и носи успешно учество на натпревари ширум светот, придружено со голем број награди. Детето има многу силна приврзаност кон Бугарија и често ги црта убавините на Родопите, бидејќи е од нашиот прекрасен град Златоград“, вели Ананиева.

Патиштата на ученичката и наставничката по уметност се вкрстуваат за време на пандемијата и оттогаш девојчето учи онлајн.

„Нашата приказна е доказ дека онлајн учењето може да биде многу успешно. Имам ученици не само од Бугарија, туку и од други земји“, додаде наставничката.

Неодамна 11-годишната Дијана постигна уште еден голем успех. Таа освои златен медал на светски форум организиран од Кина и посветен на екологијата. Доделувањето на наградата е планирано за следниот месец, а ќе се одржи во Плевен. Тогаш има можност наставничката и ученичката да се сретнат во живо.