33-ти Меѓународен детски Велигденски фестивал во Босилеград
Во Босилеград на 12 април свечено беше отворено 33-тото издание на Меѓународниот детски велигденски фестивал, кој традиционално ги обединува деца од повеќе земји околу празникот Велигден и народните обичаи, јавува Гласпрес.
Отворањето се одржа во училишниот двор, а фестивалот го прогласи за отворен организаторот Александар Димитров, кој ги поздрави учесниците и гостите. Во поздравните пораки беше нагласено дека настанот е значаен симбол на бугарската култура, традиции и пријателството меѓу децата од различни држави.
На свеченоста беше прочитано и обраќање од министерката за надворешни работи на Бугарија, Надежда Неински, во кое се истакнува дека „овој празник не би бил можен без поддршката на државата, без напорите на организаторите и без учесниците кои му ја даваат вистинската смисла“. Поздравно писмо беше прочитано и од претставници на бугарската амбасада во Белград и Генералниот конзулат во Ниш.
Фестивалската програма вклучи учесници од странство, меѓу кои ансамбли од Романија и Молдавија, како и музички настапи на Румена К’нчева и други изведувачи. Вечерната програма беше исполнета со концерти и фолклорни настапи, а особено внимание привлече рок концертот на групата „Престо“, од Благоевград, која ја воодушеви публиката.
Централен настан на фестивалот беа натпреварите за најцврсто велигденско јајце. Во категоријата до 5 години победи Никола Георгиев од Софија, додека кај децата од 6 до 14 години првото место го освои Настја Могилдја од Молдавија, која ја одбрани титулата од минатата година. Второто место му припадна на Матеја Спасиќ од Босилеград, а третото го поделија Кристијан Генов исто од Босилеград и Огњан Недиќ од Врање.
Во другите категории, за најоригинално јајце беше наградена Ана Славова од Молдавија, а за најубаво јајце Викторија Владимирова од Софија. Победниците добија пехари, медали и награди, додека за сите учесници беа обезбедени подароци.
Фестивалот продолжува со културна програма, вклучително и театарската претстава „Бултериер“ во изведба на Народниот театар „Иван Вазов“ од Софија.
