АСОМ повторно со писмо до Гир: Владата ги игнорира вашите апели да не се врши злоупотреба на европското знаменце

Асоцијацијата на спортските обложувачници на Македонија (АСОМ), денес вторпат испрати писмо до Делегацијата на Европската Унија во земјата со цел да ја изрази својата загриженост што и покрај апелите на евроамбасадорот Дејвид Гир да не се врши злоупотреба на европското знаменце за скратување на дискусијата при носење важни закони, предлог-измените на Законот за игрите на среќа Владата ги достави до Комисијата за европски прашања во Собранието.

„Нашите апели и заложби повторно не беа сфатени сериозно, а тоа е очигледно бидејќи измените на Законот за индустријата за игрите на среќа се доставени на усвојување. Со тоа Владата, сепак, изврши злоупотреба на европското знаменце со цел да оневозможи јавна расправа за овој важен закон“, се вели во писмото од АСОМ.

Од Асоцијацијата велат дека оваа одлука е во спротивност со принципите на европските интеграции на нашата држава и сериозно задира во надлежноста на пратениците од Комисијата за европски прашања посочувајќи дека Законот за игрите на среќа и забавните игри не подлежи на обврска за усогласување со донесена ЕУ-директива.

„Членките на Европската Унија немаат усогласено и донесено директива, која е правно обврзувачка за членките на Унијата и која истовремено ќе претставува обврска за пристапните членки на ЕУ да ја транспонираат таа директива во сопственото законодавство. Европската Унија има донесено препорака CELEX32014H0478, која се однесува на заштита на потрошувачите и играчите на интернет-игри на среќа и спречување на малолетниците за учество во интернет-игрите на среќа. Предлагачот на законот како основ за означување на текстот на законот со ЕУ-знаменце ја зел оваа препорака, која не е правно обврзувачка за членките на Унијата, а уште помалку за пристапните членки на ЕУ“, велат од АСОМ.

Според АСОМ, означувањето на предлог-текстот на законот со ЕУ-знаменце, заради негово усогласување со препорака на ЕУ, преставува директна злоупотреба на механизмот за усогласување на домашното законодавство со законодавството на ЕУ.

„Членовите на Комисијата не треба да го разгледуваат предлог-законот поради ненадлежност, дополнително, новите измени се косат со Уставот на Република Северна Македонија, односно прекршуваат 4 члена од Уставот. Одлуката на Владата да ја забрани јавната дебата со злоупотреба на ЕУ-знаменце за измените на постојната законска регулатива за индустријата за игри на среќа се коси со европските вредности. Токму тие европските вредности ѝ се потребни на самата земја за да има модерно, стабилно, развиено општество, кое ќе ја води нашата држава кон членство во ЕУ“, посочуваат во писмото од АСОМ.

Асоцијацијата реагира дека Владата во овој случај го скратува правото на дебата, т.е. демократското носење одлуки и правните процедури. Од АСОМ посочуваат дека тоа се коси со европските нормативи и Владата, наместо да се стреми во нашата држава да има европски институции, свесно создава неефикасни, кои не ги штитат граѓаните и бизнис-секторот во земјата.

АСОМ во писмото побараа средба со евроамбасадорот Дејвид Гир со цел лично да го информираат за злоупотребата и недемократскиот пристап на Владата кон индустријата на игри на среќа.