Габриел: Дипломатијата е кауза за одбрана на националните интереси

Дипломатијата е одговорност кон општеството. Со вашето присуство испраќаме многу силна порака дека треба да ја цениме дипломатската служба. Ова го изјави министерката за надворешни работи на Бугарија Марија Габриел, на Отворениот ден во МНР, јавува БГНЕС.

Габриел истакна дека денес во МНР луѓето можат да ги споредат нивните идеи за дипломатскиот свет, да се изненадат и да нагласат дека дипломатијата е кауза за одбрана на националните интереси. Шефицата на бугарската дипломатија посочи дека Бугарија имала светли моменти во историјата, во кои се нашло решение во најтешките ситуации, благодарение на дипломатијата.

Габриел нагласи дека годинава се прославува и 144-годишнината од формирањето на бугарската дипломатска служба.

„Посакувам сите заедно, вреднувајќи ги традициите, културата, историјата, да гледаме во иднината со поголема самодоверба и со повеќе знаење“, рече таа. Габриел додаде дека денес, кога зборуваме за дипломатија, таа треба да е поврзана со светлината на знаењето и со пристапот до информација.

„Дипломатијата има свои тешки моменти, и верувајте ми, луѓето кои работат во оваа зграда знаат дека има тешки, напорни, тензични моменти, но нема поголема сатисфакција од тоа да сте придонеле за мирот, да сте придонеле за одбраната на националните интереси, да сте го дале својот придонес, сите да живееме во подобар, помирен и поправеден свет“, рече Габриел.

Десетици луѓе, меѓу кои и ученици од цела Бугарија, ја искористија можноста да се втурнат во светот на дипломатијата со присуство на Отворениот ден во Министерството за надворешни работи.

Во „Домот на бугарската дипломатија“ жителите и гостите на главниот град се прошетаа по т.н. „Црн мермер“ – фоајето низ кое низ годините поминале стотици официјални странски делегации, и имаа можност да се запознаат со работата на различните дирекции на институцијата, фокусирани во различни сфери на бугарската надворешна политика.

Посетителите имаат можност да ги разгледаат конференциските сали, импресивната колекција на уметнички дела, како и кабинетот на министерката за надворешни работи Марија Габриел, каде за најмалите посетители е подготвено изненадување – специјална фотосесија на столот на дипломат број 1, која е под мотото „Како кога ќе пораснам сакам да бидам министер за надворешни работи“.