Бугарскиот главен град Софија слави 147 години од своето ослободување

Бугарскиот главен град Софија денеска слави 147 години од ослободувањето од османлиската власт. На 4 јануари 1878 г по серијата борби во рамките на Руско-турската војна (1877-1878) руските воени единици под команда на ген. Јосиф Гурко победнички влегуваат во градот. Во црквата „Света Недела“ (тогаш „Свети Крал“), во присуство на Гурко се одржало опело во спомен на загинатите и молитва за ослободување на градот, јавува БГНЕС.

На денот кога Софија ја слави значајната годишнина, софијанци им оддаваат почит и на европските дипломати, кои во далечната 1878 г. помогнале да се зачува градот.

Ноќта меѓу 3 и 4 јануари, кога Софија го чекала влезот на руската војска, пред да го напушти градот, турскиот командант Осман Нури-паша издал наредба градот да се запали. Вицеконзулите на Франција и Италија – грофот Леандер Франсоа Роне ле Ге и Виторио Позитано категорично наведуваат дека ќе останат во градот во знак на солидарност со локалното население. Им се придружиле австроунгарскиот вицеконзул Јозеф Валдарт и главниот рабин на градот Габриел Алмоснино. Храбриот чин на дипломатите довел до откажување на наредбата за палење и Софија била спасена.