Бугарија предлага нацрт-договор на Северна Македонија за изградба на граничниот железнички тунел од Коридорот 8
Бугарската влада испратила на Република Северна Македонија нацрт-договор за подготовка, изградба и работа на прекуграничниот железнички тунел што ги поврзува двете земји. Предлогот на бугарската држава е двете влади да преземат конкретни и јасни заложби за реализација на граничниот железнички тунел, кој е клучен елемент на Коридорот 8, информираат од Министерството за транспорт за БГНЕС.
Со потпишувањето на документот што го подготви Министерството за транспорт и врски, ќе се договорат техничките, финансиските, правните и организациски прашања поврзани со изградбата на тунелот, што треба да биде во согласност со европското и националното законодавство на двете земји.
Страните ќе се договорат која од нив ќе одговара за изградба на прекуграничниот објект, за јавните набавки и за надзорот на градбата. Планирано е директорите на железничкиот транспорт во Бугарија и Северна Македонија да создадат заеднички работни групи за подготовка на потребната документација за тендерските постапки.
Во рок од три месеци од стапувањето во сила на Договорот, Бугарија и Северна Македонија мора да подготват и да испратат до Европската комисија и финансиските институции генерален распоред за реализација на изградбата. Двете земји ќе вложат максимални напори за да обезбедат грант-помош за изградбата на објектот и неговата соседна железничка инфраструктура, во согласност со барањата на ЕУ и НАТО во однос на стандардите за Трансевропска транспортна мрежа (TEN-T), исто така се наведува во нацрт-договорот.
Бугарската страна е подготвена што поскоро да ги започне преговорите со Република Северна Македонија за предложените текстови, а потоа да продолжи со нивно потпишување.
