Голем број граѓани на Кочани излегоа на „Марш на ангелите“ барајќи правда за жртвите и настраданите во дискотеката „Пулс“

Семејствата на младите луѓе што ги загубија своите животи во трагедијата во дискотеката „Пулс“ во Кочани организираа протестен „Марш за ангелите“. На маршот, кој се одржа денеска, присуствуваа многу граѓани, кои го споделија својот бол и бараа правда за своите блиски.

Маршот започна во 12:05 часот од Паркот на Револуцијата, што симболично го означува задоцнетиот институционален одговор. Присутните носеа транспаренти со пораки како „Ова не е несреќа, ова е убиство“ и „Коруптивниот систем ги уби нашите деца“, како и фотографии од починатите.

Маршрутата ги опфати Трговскиот центар, зградата на Општина Кочани, Полициската станица и Основниот суд и Обвинителството. Присутните кратко се задржаа пред овие институции, барајќи одговорност за трагедијата. Една од мајките емотивно праша кој е виновен за загубата на младите животи.

Граѓаните нагласија дека ако институциите ги исполнувале своите задачи, трагедијата можела да се избегне. Тие изразија одлучност да ја бараат правдата до крај, потенцирајќи дека ќе продолжат со своите активности.

Воедно, беше најавен уште еден протестен марш под името „Ваш профит – наши животи“, со слична рута. Организаторите повторно ги повикаа институциите на брза и непристрасна истрага и судска постапка. Маршот беше симбол на единството и решителноста на граѓаните во борбата за правда.