Борисов: Само преку партнерство меѓу САД и ЕУ е можен траен мир во Украина

Лидерот на ГЕРБ, Бојко Борисов, изјави дека долгорочната цел на Европа треба да биде достигнување одржлив мир во Украина, што може да се обезбеди единствено преку тесно партнерство меѓу Европската унија, САД и самата Украина, јавува БГНЕС.

„Мир, кој ќе ја гарантира безбедноста на украинските граѓани, стабилноста во регионот и ќе ги брани вредностите на слободата и демократијата. Само со солидарност, доследност и обединети напори можеме да ѝ помогнеме на Украина“, нагласи Борисов за време на онлајн средбата на лидерите на Европската народна партија (ЕНП), инициирана од претседателот на најголемата група во Европскиот парламент, Манфред Вебер.

На состанокот учествувала и претседателката на Европската комисија, Урсула фон дер Лајен, која детално ги запознала присутните со разговорите што претседателот Володимир Зеленски и европските лидери ги имале со американскиот претседател Доналд Трамп во Вашингтон.

„Со колегите ги дискутиравме следните чекори за создавање услови за траен и праведен мир“, додаде Борисов.