Изложба на Драгана Павловска во галеријата и фондацијата Credo Bonum во Софија

Денеска со почеток од 18.00 часот, во галеријата и фондацијата Credo Bonum во Софија ќе биде отворена изложбата на ликовната уметница од Република Северна Македонија Драгана Павловска. Публиката ќе има можност да ја разгледа изложбата до 18 октомври, јавува БГНЕС.

Сликарството на Павловска носи необична сила – реалноста ја прикажува на магичен, натприроден и бајковит начин, со што станува безмилосно вистинита. Со внимателни движења на четката таа создава сложени сликарски ткаенини, на кои ги поставува своите ликови – луѓе и животни – во раскошна природа што раскажува приказни за загуба, страв, надеж и љубов.

Зад секое платно стои јасна или поскриена приказна, раскажана преку алегории и симболи, кои секој гледач има право да ги толкува според сопственото искуство. Делата опфаќаат мотиви како судбината на двајца млади вљубени од Босна, убиени при обид за бегство за време на војната; соживотот на луѓето во паралелни времиња во едно заедничко поле, претставено во стил на црковни фрески; и човечкото тело – ранливо и неподложно на црно-бели пресуди.

„Цртам она што не можам да го изразам на друг начин. Чувствата што произлегуваат од неизбежноста на заплетканоста во оваа парадоксална сцена, наречена ‘реалност’, можеби се токму тоа – необјасниви. Уметноста ја создавав не за да прашувам или да нудам решенија, туку едноставно за да прикажам“, вели уметницата.

Драгана Павловска е родена во 1996 година во Виница, Северна Македонија. Нејзината практика е насочена кон наративното фигуративно сликарство, на границата помеѓу реалното и фантастичното, каде што ликот станува основа за истражување на човечката состојба. Во 2020 година дипломира на катедрата „Сликарство“ при Националната уметничка академија во Софија, во класата на проф. Андреј Даниел. Денес живее и работи во Софија.