Во тек дистрибуцијата на вакцините против сезонски грип – вакцинацијата започнува неделава
Министерството за здравство соопшти дека е во тек дистрибуцијата на вакцините против сезонски грип низ јавните здравствени установи ширум државата. Очекувањата се дека во текот на оваа недела ќе започне вакцинацијата, а граѓаните кои се пријавиле за бесплатна вакцинација ќе добијат СМС-порака со точен термин и локација за вакцинација.
Вакцинацијата ќе се спроведува на 35 вакцинални пункта низ земјата, од кои пет во Скопје, со цел да се овозможи полесен пристап за сите граѓани.
Паралелно, и понатаму е во тек пријавувањето за бесплатна вакцинација за ризичните групи население. Пријавувањето може да се изврши преку пополнување на апликацијата на веб-страницата vakcinacija.mk или преку матичниот лекар.
Со бесплатната вакцинација се опфатени следниве категории граѓани:
- лица постари од 65 години,
- лица со хронични заболувања,
- здравствени работници,
- бремени жени,
- деца од 6 месеци до 5 години,
- лица сместени во установи за социјална заштита на стари лица и вработените во тие установи.
Министерството нагласува дека вакцинацијата е најефикасна превентивна мерка за заштита од сезонски грип и намалување на ризикот од компликации кај најранливите категории граѓани.
Оваа година се набавени 80.000 дози четиривалентна вакцина од реномираниот производител „Абот“ од Холандија, која обезбедува заштита од четири различни соеви на вирусот на грип.
