Заеднички проект на Министерството за здравство и општина Гази Баба – по шест децении ќе се гради нова амбуланта во Автокоманда

Министерот за здравство, Азир Алиу, и градоначалникот на Општина Гази Баба, Бобан Стефковски, денеска во Министерството за здравство потпишаа договор за изградба на нова амбуланта во населбата Автокоманда. Новиот здравствен објект ќе функционира во рамки на Здравствениот дом Скопје.

Според договорот, новата амбуланта ќе биде изградена на местото на постојниот, дотраен и руиниран објект кој бил подигнат непосредно по скопскиот земјотрес во 1963 година.

„Изградбата на оваа амбуланта е добар пример за соработка меѓу централната и локалната власт, со заедничка цел – унапредување на здравствените услуги за граѓаните“, изјави министерот Алиу.

Општина Гази Баба и Министерството за здравство ќе соработуваат во изготвувањето на потребната проектна документација, како и во сите фази на подготовка и реализација на проектот.

Со овој заеднички потфат, институциите најавуваат подобрување на здравствената инфраструктура во Автокоманда и создавање современи услови за работа на здравствените работници и за квалитетна здравствена услуга за жителите на оваа населба.