Патување со воз од Софија до Атина за само 6 часа до 2040 година

Патувањето со воз од Софија до Атина ќе трае само шест часа според планот на Европската комисија за високобрзинска железничка мрежа во Европа. Проектот, дел од иницијативата TEN-T, предвидува до 2040 година клучните европски престолнини да бидат поврзани со возови што ќе се движат со брзина над 200 километри на час. Целта на Брисел е да создаде поефикасен, одржлив и конкурентен транспортен систем во Европската унија, јавува БНР.

Во моментов патувањето меѓу двете балкански престолнини трае речиси 14 часа. Новата мрежа ќе ја преполови оваа временска рамка и ќе скрати и други релации на континентот: Берлин – Копенхаген ќе се патува четири часа наместо седум, а ќе се воспостават и нови трансгранични линии, меѓу кои Париз – Лисабон преку Мадрид, како и директни врски меѓу балтичките држави.

Покрај железничката стратегија, Комисијата го претстави и Планот за одржливи инвестиции во транспортот, со фокус на горивата за авијацијата и морскиот сектор. Според механизмите RefuelEU Aviation и FuelEU Maritime, до 2035 година ЕУ ќе има потреба од 20 милиони тони одржливи горива, што ќе бара инвестиции над 100 милијарди евра.

Плановите ја потврдуваат амбицијата на Унијата да ја забрза зелената трансформација и да го направи транспортот побрз, поповрзан и поеколошки.