Познатата бугарска пејачка Нина Николина и „Магичните гласови“ со три концерти во Јапонија

Три концерти на бугарската пејачка Нина Николина и формацијата „Магични гласови“ ќе се одржат во Јапонија во периодот од 4 до 6 април, соопштија од Амбасадата на Бугарија во Јапонија на својата Фејсбук-страница, пренесува БТА.

Турнејата вклучува настапи во Сендај на 4 април, во Токио на 5 април и во Мито, префектура Ибараки, на 6 април. Настаните се организираат со поддршка на Амбасадата на Бугарија во Токио и со поддршка на Националниот фонд „Култура“.

„Во пресрет на Велигден имаме чест да Ве поканиме на свечен концерт на Нина Николина и „Магичните гласови“ – „Бугарската музика – од традиции до џез“, посочија од бугарската дипломатска мисија.

Во програмата на концертите е вклучено и учество на Тихомир Јорданов со изведба на гајда. „Во концертот учествува и Тихомир Јорданов со изведба на гајда, која беше впишана во списокот на УНЕСКО за нематеријално културно наследство во декември 2025 година“, додадоа од Амбасадата.

Концертот во Сендај ќе се одржи на 4 април од 14:00 до 15:30 часот по локално време во Miyagino Ward Cultural Center – Partner Theater, при што салата ќе биде отворена за публика од 13:30 часот.

На 5 април концертот во Токио ќе започне во 16:00 часот во салата на Амбасадата на Бугарија.

Завршниот настан од турнејата ќе се одржи на 6 април од 18:00 часот во The Hirosawa City Hall – мала сала во градот Мито, а влезот ќе биде слободен.

Од Амбасадата појаснуваат дека за концертот во Токио е потребна претходна регистрација преку онлајн формулар.