Бугарска делегација предводена од премиерот Радев во посета на Париз и Брисел

Бугарскиот премиер Румен Радев, ќе ги посети Париз и Брисел во периодот 27 – 28 мај 2026 година, јавува БГНЕС.

Во Париз премиерот Радев ќе се сретне со францускиот претседател Емануел Макрон. Нивниот разговор ќе се одржи во среда, 27 мај, во Елисејската палата, каде што бугарскиот премиер ќе биде пречекан со почесен шпалир од гардисти. Премиерот Радев и претседателот Макрон ќе разговараат за теми од областа на билатералната соработка и од европската агенда.

Подоцна истиот ден претседателот на Владата Румен Радев ќе отпатува за Брисел, каде што ќе одржи средба со белгискиот премиер Барт Де Вевер.

Во четврток, 28 мај, премиерот Румен Радев ќе се сретне со генералниот секретар на НАТО Марк Руте. Подоцна истиот ден бугарскиот претседател на Владата ќе разговара со претседателката на Европската комисија Урсула фон дер Лајен и со претседателот на Европскиот совет Антонио Кошта.

Во составот на бугарската делегација, која ќе ги посети Париз и Брисел, учествуваат вицепремиерите Александар Пулев, Иво Христов и Атанас Пеканов, како и министерката за надворешни работи Велислава Петрова и министерот за одбрана Димитар Стојанов.