Средба Христов-Милотинова-Грин: Бугарија бележи значителен напредок во подготовките за „Евровизија 2027“

Вицепремиерот Иво Христов, директорот на „Евровизија“ Мартин Грин и генералната директорка на Бугарската национална телевизија (БНТ), Милена Милотинова, на средба констатираа значителен напредок во подготовките на Бугарија за домаќинството на музичкиот натпревар, соопшти владината прес-служба, пренесува БТА.

Мартин Грин истакна дека брзината и ефикасноста со кои бугарската влада и државните институции ги организирале неопходните активности оставиле силен впечаток.

„Бугарија нè импресионираше со исклучително брзата реакција и професионалниот пристап кон подготовките. Нема друг сличен случај во историјата на натпреварот. Тоа ни дава сериозни основи да очекуваме успешно домаќинство и навистина незаборавен културен настан“, изјави Грин.

Вицепремиерот Иво Христов изрази благодарност до пејачката Дара, чија победа ѝ овозможила на Бугарија да биде домаќин на „Евровизија“ следната година.

„Ова е исклучителна можност да ја претставиме пред светот нашата богата култура, креативниот потенцијал и да оствариме долгорочни придобивки за земјата“, изјави Христов. Тој нагласи дека домаќинството на „Евровизија“ е начин Бугарија да го промовира своето културно наследство пред меѓународната публика и да генерира значителни економски и други придобивки.

Генералната директорка на БНТ Милотинова соопшти дека Софија, Пловдив, Варна и Бургас продолжуваат во трката за домаќин на музичкиот натпревар „Евровизија“ во 2027 година. Фаворитот ќе биде објавен во јули.