Техничкиот универзитет-Софија развива водородни технологии за складирање на зелена енергија
Научници од Техничкиот универзитет – Софија развиваат технологии за складирање на вишокот зелена енергија и нејзино користење во периоди на најголема потрошувачка, јавува бугарскиот дневен весник 24 часа. Според проф. д-р Ангел Терзиев, целта е „преку зелените технологии да се зголеми ефикасноста на енергетските системи и истовремено да се намали влијанието врз животната средина“.
Клучно решение во истражувањата е зелениот водород. Вишокот електрична енергија од обновливи извори може да се користи за производство на водород преку електролиза на вода, по што тој се складира и подоцна се употребува за производство на електрична енергија или топлина. „Наместо евтината електрична енергија да биде изгубена, таа се претвора во енергетски ресурс што може да се користи тогаш кога е најпотребен“, истакнува Терзиев.
Најголем потенцијал за примена научниците гледаат во енергетски интензивните индустрии, како цементната, стакларската, керамичката, металуршката и хемиската индустрија. Тимот работи и на технологии за мешање водород со природен гас во постојни горивни инсталации, со што би се намалил јаглеродниот отпечаток.
Паралелно, ТУ-Софија ја развива интелигентната система Smart End, која обединува фотоволтаици, ветерни генератори, батерии, водородно складирање и електродистрибутивна мрежа. Системот во реално време ќе го следи производството, потрошувачката и цените на електричната енергија и автоматски ќе одредува кој ресурс е најисплатлив за користење.
Во универзитетот функционира и лабораторија за стабилност на електроенергетските системи, каде се симулираат големи енергетски хаварии во контролирана средина. „Нашата работа е да направиме електроенергетскиот систем да функционира без да се распаѓа – и ако сепак се случи, тоа да биде што е можно поретко“, вели доц. д-р Рад Станев.
Истражувањата се дел од проектот „Подобрување на научноистражувачкиот капацитет и квалитет за меѓународна препознатливост и одржливост на ТУ-Софија“ (BG-RRP-2.004-0005).
