Јотова со честитка до Доналд Трамп и американскиот народ по повод 250 години од независноста на САД

Идеите вградени во Декларацијата за независност на САД остануваат важен морален ориентир и основа за меѓународна соработка во услови на глобални предизвици. 250-годишнината од независноста на САД е повод за увереност во силата на слободата, демократските институции и партнерството меѓу нашите држави. Ова стои во честитка до претседателот на САД, Доналд Трамп од претседателката на Бугарија Илијана Јотова , по повод Денот на независноста на земјата – 4 јули.

По повод националниот празник, бугарската претседателка му посака на американскиот народ успеси, мир и благосостојба, соопштија од прес-секретаријатот на шефот на државата, пренесува БГНЕС.

„Пред два и пол века основачите на американската држава утврдуваат принципи кои оставаат траен белег врз развојот на современиот демократски свет – сите луѓе се создадени еднакви и поседуваат неотуѓиви права, меѓу кои правото на живот, слобода и стремеж кон среќа“, истакнува претседателката Јотова. Според неа, овие принципи продолжуваат да инспирираат генерации во нивниот стремеж кон слобода, човечко достоинство и подобра иднина.

Шефицата на бугарската држава ги истакнува пријателските односи и стратешкото партнерство меѓу Бугарија и САД. „Убедена сум дека врз основа на меѓусебната доверба, споделените демократски принципи и нашата сојузничка солидарност ќе продолжиме да ја развиваме и продлабочуваме билатералната соработка во областа на безбедноста и одбраната, економијата, инвестициите, енергетиката, науката, иновациите и образованието“, вели претседателката.