1.200 војници од 11 земји учествуваа на вежбата „Alliance Wall“ во Бугарија

Околу 1.200 војници и 170 единици воена техника од 11 земји учествуваа на големата тактичка вежба со боево гаѓање „Alliance Wall“ на полигонот „Ново Село“ во Бугарија, јавува Armymedia.

Во вежбата беа вклучени припадници на осум земји од мултинационалната борбена група на НАТО, американски единици, како и гостински сили од Полска, Шпанија и Франција. Беа употребени артилериски системи, тенкови, борбени возила и авиони Су-25 од базата Безмер.

Според сценариото, сојузничките сили одговорија на противнички артилериски напад, по што изведоа координирани артилериски, воздушни и копнени дејства и завршна контраофанзива.

Заменик-командантот на мултинационалната дивизија на НАТО „Југоисток“, бригадниот генерал Сирил Матиас, оцени дека вежбата ја покажала способноста на сојузниците за заедничко дејствување и дека постојат сите потребни капацитети борбената група да прерасне на ниво на бригада.

Заменик-командантот на борбената група, потполковник Марин Цаловски, изјави дека оценката за бугарските војници е „одлична“, нагласувајќи дека тие ги поминале сите видови обука и постигнале целосна координација со сојузничките и бугарските воени структури.