НВУ „Васил Левски“ отвори информативно катче за програмата „Еразмус“

Во Националниот воен универзитет „Васил Левски“ во Велико Трново е отворено информативно катче за размена на искуства и промовирање добри практики од програмата „Еразмус“, со цел да се поттикнат питомците, студентите и академскиот кадар да учествуваат во меѓународна образовна мобилност, јавува Армимедија

„Ова е пред сè место за мотивирање на младите луѓе и на нашите колеги од академскиот состав да се обучуваат преку оваа програма со цел надградување на компетенциите, развивање вештини и стекнување нови знаења“, изјави полковник доцент д-р Невена Атанасова, предавач на Катедрата за национална и регионална безбедност при Факултетот за безбедност и одбрана.

Во катчето се достапни информативни и промотивни материјали преку кои заинтересираните можат да се запознаат со можностите за обука и стручно усовршување. Според Атанасова, неформалната средина треба да придонесе за полесна комуникација, размена на идеи и поголема мотивација за учество во програмата.

Началникот на НВУ, бригаден генерал д-р Станчо Кајков, посочи дека близу 10 отсто од питомците досега учествувале во обуки во рамките на „Еразмус“.

Според него, една од целите на универзитетот е идните офицери да бидат подготвени за работа во мултинационална средина. Практичната и академската обука во европски воени образовни институции, како и соработката со партнери од НАТО, треба да им помогнат по завршувањето на студиите да работат посигурно во таква средина.

„Филозофијата на самата програма е академска, но еден од нејзините елементи е надминување на различните национални бариери меѓу државите“, изјави Кајков.

Обуките и практичната настава реализирани во странство се признаваат од НВУ во согласност со европскиот систем за трансфер на кредити и се внесуваат во европскиот додаток на дипломата. Тоа се однесува на меѓународни семестри и практична обука за кои се стекнуваат соодветни кредити.

Атанасова истакна дека меѓународното искуство и способноста за работа во средина со различни културни и професионални специфики се значајни за понатамошната професионална реализација на питомците и студентите.

Во рамките на програмата повеќе од 15 години се развива и иницијативата „Воен Еразмус“, насочена кон засилена академска размена меѓу военообразовните институции во Европа. НВУ е домаќин на серверот со информациите за иницијативата и е одговорен за неговото техничко одржување.

Претставници на универзитетот – питомци, предавачи и офицери – учествуваат во активности со нагласена воена подготовка. Според Атанасова, целта е хармонизирање на военото образование во Европа и создавање услови за оперативна интероперабилност меѓу вооружените сили на различните земји.

Бригаден генерал Кајков наведе дека „Воен Еразмус“ работи во 23 главни области распределени меѓу земјите учеснички. Бугарија е одговорна за три од нив, а за две е задолжен НВУ.