Бугарија продолжува со иницијативата „Светилник“ за создавање училишни химни

МУЗИКАУТОР на 1 октомври, Меѓународниот ден на музиката, ќе го објави конкурсот за шестото издание на националната иницијатива „Светилник“, преку која бугарската авторска заедница им подарува химни на училиштата, јавува Actualno.com.

Иницијативата ги обединува композитори, автори, ученици, наставници и партнери со цел преку музиката да се поттикнат творештвото, чувството на припадност и заедништвото во училиштата.

„За пет изданија ‘Светилник’ прерасна од идеја за создавање училишни химни во долгорочна, одржлива партнерска програма, која ги поврзува творештвото, културата и образованието и создава средина за формирање вредности во повеќе заедници“, изјави Иван Димитров, извршен директор на МУЗИКАУТОР.

Во основата на „Светилник“ е идејата дека училиштето не е само место за стекнување знаење, туку и средина во која децата го градат својот однос кон јазикот, културата, историјата и заедницата на која ѝ припаѓаат.

Училишната химна во иницијативата се гледа како музички симбол што може да се пренесува меѓу генерациите и да ги потсетува учениците на она што ги поврзува како заедница.

Учениците самите ја изведуваат химната посветена на нивното училиште, оставајќи свој гласовен запис за идните генерации. Со секое ново издание во иницијативата се вклучуваат нови училишта, автори, деца и партнери.

На 1 октомври 2026 година ќе бидат објавени условите и роковите за пријавување за шестото издание на „Светилник“, како и можностите училиштата да станат дел од програмата.

Организаторите соопштуваат дека бараат училишни заедници кои имаат приказна за својата историја, патрон, вредности и соништа што сакаат да им ги пренесат на следните генерации.

„Светилник“ е национална иницијатива на МУЗИКАУТОР за создавање училишни химни. Од 2021 година досега опфатила 33.000 ученици и повеќе од 2.300 наставници од 40 училишта во 20 населени места во Бугарија и во странство.

Иницијативата се одржува под покровителство на Министерството за култура и Министерството за образование и наука, а меѓу нејзините долгорочни партнери се Бугарската телеграфска агенција, Бугарското национално радио, Бугарската национална телевизија, НАТФИЗ „Крсто Сарафов“ и Народниот театар „Иван Вазов“.

МУЗИКАУТОР е организација на композитори, автори и музички издавачи за управување со авторски права и, според нејзините податоци, претставува повеќе од 4.000 бугарски автори и над 2,5 милиони автори од целиот свет.