Радев најави зголемување на буџетот за одбрана во Бугарија

Ќе има зголемување на буџетот за одбрана во 2027 година. Ова го изјави премиерот Румен Радев пред медиумите за време на демонстрациите на способности и борбени вештини по завршувањето на финалната етапа од натпреварот „Јастребово око 26“, што се одржа во Центарот за обука „Сливница“, пренесува БНТ.

„Исклучително сум импресиониран од она што го видов, и во однос на способностите и во однос на вештините. За две години е постигнат огромен напредок“, изјави Радев по демонстрациите.

„Во 2026 година имаме трошоци за одбрана во висина од 2,13 отсто од БДП, а амбицијата е во 2027 година, и покрај тешката состојба со буџетот, средствата за армијата да бидат зголемени. Тоа е наша коалициска обврска“, посочи Радев.

На натпреварот „Јастребово око 26“ учествуваат осум екипи од формациите на Копнените сили, а воените лица демонстрираат знаења и практични вештини во управување со беспилотни летачки системи. По завршната етапа на „Јастребово око 26“ ќе бидат наградени победниците.

Натпреварот беше отворен на 18 септември од заменик-командантот на Копнените сили, бригадниот генерал Пламен Јорданов. Тој се одржува согласно правилата за безбедно летање утврдени со европските прописи за употреба на беспилотни летала во отворена категорија.