Галина Јорданова: Вистинското лидерство почнува со познавање на самиот себе

Успешното лидерство не зависи само од професионалната експертиза, туку и од самоспознавањето, способноста за поставување лични граници и разбирањето на луѓето, смета Галина Јорданова, специјалист за човечки ресурси и коуч, која шест години живее во Швајцарија, пишува БТВ.

Во интервју за „Жените на Бугарија“, Јорданова вели дека една од најчестите грешки во компаниите е за раководител да биде избран најдобриот стручњак во одредена област, без да се земат предвид неговите способности за управување со луѓе.

„Една од основните грешки е да се назначи лидер или менаџер кој е најдобриот специјалист во соодветната област. Но, тоа се различни вештини. Можеш да бидеш многу добар во нешто, но да не бидеш добар менаџер“, вели таа.

Според неа, основата на лидерството е познавањето на сопствените вредности, стравови и внатрешни конфликти.

„Прво, сè започнува со самоспознавањето. Кој сум јас? Кои се моите вредности?“, посочува Јорданова.

Таа оценува дека универзитетското образование може да обезбеди теоретска подготовка, но дека управувањето со луѓе бара практично искуство, самоконтрола и способност за преземање одговорност.

Посебно значење, според неа, има способноста да се каже „не“ и да се постават јасни граници.

„Силата да кажеш ‘не’ и да поставиш граници е една од особините што ги определуваат успешните лидери сега и во иднина“, вели Јорданова.

Како што додава, одбивањето во професионалната средина често се доживува како ризик, но може да биде и начин човек да ги заштити сопствените вредности и приоритети.

„За мене, умешноста да кажеш ‘не’ значи умешност да кажеш ‘да’ на себеси и да ги браниш своите граници“, нагласува таа.

Јорданова завршила две магистерски студии во Бугарија – по меѓународни економски односи и корпоративна безбедност. Интересот кон човечките ресурси, како што вели, се развивал постепено преку нејзината љубопитност кон луѓето и нивното однесување.

Еден од клучните моменти во нејзиниот професионален развој бил за време на интервју за работа во Виена, кога на околу 25-годишна возраст јасно ја формулирала желбата да се занимава со обука и коучинг.

„Одеднаш едноставно реков: сакам да бидам тренер, сакам да бидам коуч, сакам да им помагам на луѓето да се развиваат“, раскажува Јорданова.

Таа десет години живеела во Австрија, а последните шест години во Швајцарија. Според неа, искуството во германскојазичните земји ѝ овозможило да ги согледа разликите во работната и општествената култура.

„Швајцарците се исклучително прецизни. Сме слушале за швајцарската точност и швајцарскиот квалитет. Тоа навистина е така“, вели таа.

Јорданова посочува дека во Швајцарија коректноста, специјализацијата и високите стандарди се важен дел од секојдневното функционирање, додека социјалните односи може да изгледаат подистанцирани во споредба со бугарската култура.

„Може да ви изгледаат студени, дистанцирани, дури и стерилни. Но, тоа е друга култура која човек треба да се обиде да ја разбере. Откако ќе ја разбереш, веќе можеш да работиш со неа“, вели таа.

Во следниот период Јорданова планира да го развива проектот „Осознаена економија“, чија цел е да се создаде систем за мерење на организациското ниво на развој на компаниите.

Проектот се фокусира на прашањето дали корпоративната култура се темели на страв и контрола или на вредности, развој и соработка, како и на можноста вработените да го реализираат својот потенцијал.

„Сметам дека човек може да го покаже својот потенцијал во работната средина и многу е важно тој потенцијал да биде забележан и да може да се развие“, посочува Јорданова.

Според неа, работното место не треба да биде извор на постојан стрес и професионално прегорување.

„Не сакаме работата да биде место за прегорување. Сакаме човекот да може да го покаже својот потенцијал, да се чувствува добро, а компанијата истовремено да му помага во тоа“, вели таа.

Во однос на развојот на вештачката интелигенција, Јорданова смета дека технолошките промени не треба да ги намалат инвестициите во човечкиот потенцијал.

„Лично сметам дека човекот треба да продолжи да инвестира во човечкиот потенцијал и во човечката свест, затоа што на крајот вештачката интелигенција, како огледало, го рефлектира нашето ниво на осознаеност“, вели Јорданова.

Според неа, иднината ќе донесе повеќе хибридни модели на работа во кои луѓето ќе соработуваат со роботи и интелигентни агенти, но технолошкиот напредок треба да биде проследен и со развој на човечките способности.