Спортски ментори ќе им помагаат на младите таленти во Бугарија со фокус на менталното здравје и развојот на кариерата
Дигиталната платформа Future Stars by Betano, наменета за поддршка на млади бугарски спортисти на возраст од 18 до 25 години, беше официјално претставена на настан со претставници на медиумите, инфлуенсери и спортисти. Програмата ќе обезбедува знаења, менторство и практични насоки за личен и професионален развој.
Младите спортисти можат да се пријават преку платформата, а учесниците ќе имаат пристап до видеоматеријали, текстуални содржини и онлајн часови со ментори. Програмата опфаќа три области: ментално здравје, професионален развој и личен раст.
Менторска поддршка ќе даваат Билјана Јотовска, фитнес-модел и писателка, Кирил Танев, фитнес-инструктор и нутриционист, и Полина Хаџијанкова, спортски психолог и поранешна професионална кошаркарка.
„Платформата е создадена за да им ги даде знаењата што често недостигаат на почетокот на професионалниот пат. Ова е долгорочен проект преку кој би сакале да помогнеме во развојот на идните спортски таленти во Бугарија“, изјави Цветин Јорданов, менаџер на Kaizen Gaming за Бугарија и раководител за спроведување на политиките за одговорно коцкање.
Според Јорданов, слични проекти веќе се реализираат во Грција, Романија и Португалија. Организаторите планираат да ја развиваат платформата и да опфатат поширок круг спортисти на почетокот од кариерата.
Материјалите ќе стануваат достапни постепено до крајот на оваа и во текот на следната година. Предвидени се и онлајн настани на кои учесниците ќе можат директно да разговараат со менторите.
Хаџијанкова нагласи дека програмата посветува посебно внимание на психолошката подготовка.
„Во програмата ставаме клучен акцент врз психичката и емоционалната отпорност, кои се толку важни за секој професионален спортист“, рече таа.
На претставувањето се одржа и дискусија за спортот и здравите секојдневни навики. Јотовска зборуваше за одржувањето на мотивацијата и развојот на емоционалната интелигенција, а Танев ја истакна важноста на исхраната, одморот и позитивниот ментален став за спортските резултати.
Специјална гостинка и амбасадорка на настанот беше Александра Фејгин, повеќекратна бугарска шампионка во уметничко лизгање и учесничка на Олимписки игри, светски и европски првенства.
„Никој не може да успее сам. Успехот се гради со талент, но и со многу труд и со секојдневни напори, компромиси и стремеж да се постигне целта“, порача Фејгин, нагласувајќи ја улогата на семејството, блиските и тренерите во развојот на спортистите.
