(Видео) Ковачев: Европскиот парламент мора да усвои јасен и недвосмислен текст за РС Македонија
Европскиот парламент мора да усвои јасен, недвосмислен текст кој нема да може да се интерпретира различно, изјави за БТА бугарскиот европратеник од ГЕРБ/ЕПП, д-р Андреј Ковачев, член на Претседателството на ЕП и претседател на бугарската делегација во Европската народна партија.
Ковачев, кој зборуваше од кулоарите на ЕП во Стразбур, изрази надеж дека и другите политички групи, освен ЕПП, ќе успеат да ги убедат своите колеги во значењето на ова прашање.
„Не смееме да ја отвораме Пандорината кутија кога станува збор за историјата и да дозволиме политичари да ја толкуваат според своите интереси. Историјата не треба да биде предмет на манипулации“, рече Ковачев.
Тој реагираше на изјавите на премиерот на Северна Македонија, кои, според него, создаваат впечаток дека Европскиот парламент наводно ќе ја признава и сертифицира „вековната историја, култура, јазик и идентитет на Македонија“.
Ковачев подвлече дека имиджот и достоинството на Европскиот парламент мора да се зачуваат преку усвојување на квалитетни и правно издржани документи.
„Работиме со сите бугарски европратеници и сите политички групи за да постигнеме јасен и недвосмислен текст, кој нема да биде предмет на различни толкувања“, нагласи тој.
Ковачев појасни дека станува збор за модерниот идентитет, култура и јазик на „новоформираната држава, која по 1944 година беше дел од Југославија, а потоа стана независна држава, прва признаена од Бугарија – со цел да се спречи можна интервенција од Милошевиќ“.
Повеќе во видеото што следи:
