Бугарија разгледува поширока примена на технологиите на INSAIT во економијата и јавниот сектор
Бугарскиот вицепремиер и министер за економија, инвестиции и индустрија Александар Пулев разговараше со раководството на Институтот за компјутерски науки, вештачка интелигенција и технологии (INSAIT) за следната фаза од развојот на институтот и проширување на неговите активности во стратешки области, јавува БТА.
На средбата со основачот и научен директор проф. Мартин Вечев и извршниот директор Борислав Петров биле разгледани развојот на истражувањата во вештачката интелигенција, високите технологии и роботиката, како и можностите за технолошки трансфер и посилно поврзување на научните разработки со потребите на бизнисот.
Посебно била разгледана можноста за заедничка иницијатива за примена на технологии на INSAIT во јавниот сектор, вклучително за дигитализација на административните процеси, намалување на административниот товар и поефикасен превентивен надзор.
„INSAIT треба да биде во срцето на дигиталната трансформација на Бугарија“, изјави Пулев, нагласувајќи дека научните разработки треба да добијат практична примена во бизнисот, индустријата и државната администрација.
Страните разговарале и за развој на високотехнолошка инфраструктура и за продлабочување на соработката меѓу државата, научната заедница и бизнисот.
