Ректорката на Софискиот универзитет, проф. Елиза Стефанова: Веќе речиси 140 години Софискиот универзитет не само што ги создава, туку и ги брани темелите на високото образование

Денес официјално ја отвораме новата академска 2026/2027 година и оваа церемонија е многу повеќе од свечен ритуал. Таа е жива врска со вредностите на Софискиот универзитет (СУ) „Св. Климент Охридски“. Веќе речиси 140 години нашата Алма матер не само што ги создава, туку и ги брани темелите на високото образование и на интелектуалната елита во Бугарија, рече ректорката на СУ, проф. Елиза Стефанова, на отворањето на академската 2026/2027 година во свечената сала на високообразовната установа, пренесува БТА.

Академската заедница на СУ денес ќе се зголеми со нешто повеќе од 5.000 студенти од прва година. На дел од нив – на 33 лауреати на национални и меѓународни натпревари и на 41 ученик со целосно одличен успех, носители на национална диплома – ќе имам задоволство лично да им ги врачам индексите, истакна проф. Стефанова.

„Додека традицијата ни дава стабилност, реалноста бара од нас флексибилност. Секоја нова учебна година нè соочува со специфични предизвици – на наставно, административно и технолошко ниво. Софискиот универзитет има неспорни достигнувања, но пред нас стојат и низа нерешени задачи. Затоа би сакала да зборуваме помалку за идеалот каков треба да биде универзитетот, а повеќе за конкретните и реални чекори што можеме заедно да ги преземеме во следните месеци. Наш главен приоритет останува постојаното подобрување на квалитетот на образованието. Тоа значи осовременување на предавањата и семинарите, воведување современ софтвер и забрзана дигитализација. Треба да ги ажурираме наставните програми таму каде што тоа го бара динамиката на знаењето и професиите, за соодветно да одговориме на времето во кое живееме. Клучно за нас е да им обезбедиме на студентите можности за стекнување вистински практични вештини што ќе им гарантираат успешна професионална реализација. Се стремиме кон потесна поврзаност меѓу наставата, научните истражувања и практичните потреби на бугарското општество и економија. Потпирајќи се на прагматизмот, должни сме да ги зачуваме добрите академски практики во наставата, оценувањето и управувањето со нашите факултети и институти“, рече во своето обраќање проф. Елиза Стефанова.

Таа им се обрати на студентите со ветување дека ќе продолжи да се гради подобра и инспиративна средина за учење.

„Инвестираме во современа инфраструктура, во одлично опремени лаборатории, во богати библиотеки и дигитални ресурси. Ќе ги прошириме програмите за меѓународна размена за студентите да имаат глобален хоризонт – Европа, Азија, Америка, Африка. Со програми како EXPLORER, универзитетот, преку институтот INSAIT, покажува како уште од студентските клупи е можно сите вие, талентите што сте дел од Софискиот универзитет, активно да се вклучите во вистински истражувачки и професионални проекти“, додаде ректорката.

Во своето обраќање проф. Елиза Стефанова им се обрати и на професорите на Софискиот универзитет, истакнувајќи дека должност е да се создаваат услови за високи научни достигнувања, да се поддржуваат младите научници и да се интегрираат во меѓународни истражувачки мрежи. Еден универзитет ја исполнува својата вистинска мисија не само кога го пренесува акумулираното знаење, туку и кога неговиот академски кадар е двигател во создавањето ново знаење. Горда сум што нашите научни и истражувачки тимови имаат импресивни достигнувања и работат заедно со колеги од други водечки институции, нагласи ректорката.

Во текот на оваа година ќе продолжиме насочено да инвестираме во универзитетската инфраструктура и во дигитализацијата на административните процеси. Нашата цел е транспарентно управување, оптимизација на ресурсите и реално намалување на административниот товар. Но има нешто што не може да се купи со инвестиции и да се замени со технологии, а тоа се академскиот дух и вредностите. Тие го прават СУ водечка образовна институција не само кај нас, туку и со утврден углед во Европа и во светот. Системите за рангирање и акредитациите се важни мерила, но не ја опфаќаат целосно нашата суштина. Нашиот универзитет не е само збир од згради, администрација и наставни планови – тој е заедница на луѓе што го опфаќаат целиот спектар на науки. Од хуманистичките и општествените, до точните, медицинските и природните науки – сите тие споделуваат една одговорност: Софискиот универзитет да биде динамичен екосистем што се развива, почитувајќи ги посебноста и придонесот на секој одделен факултет, катедра и истражувачка единица, рече проф. Елиза Стефанова.

Ние сме институција во која не само што се создава знаење, туку се формираат и светоглед и систем на вредности. Ние сме простор за слободна мисла и научни истражувања. Место во кое ги учиме студентите да ги бранат своите аргументи и да развиваат критичко мислење. Особено во времето во кое живееме, сите ние треба да се залагаме за правото на таа слобода и да ја браниме. Нашиот хоризонт е јасен: современа настава, силна наука и иновации, обновена средина, меѓународно присуство и ефикасно управување. Тоа се задачите на денешницата, но и нашите реални перспективи. Повикам во оваа академска година сите да покажеме поголема иницијативност – раководството, професорите и студентите, рече ректорката проф. Елиза Стефанова.

Софискиот универзитет „Св. Климент Охридски“ е високообразовната установа во која постои хармонијата на севкупното знаење. Тоа што сте избрале природни, хуманистички или општествени науки не значи дека треба да ја затворите вратата кон другите знаења. Тоа е магијата на универзитетот, а студентите можат со полни сили да црпат од сите гранки на знаењето и така да се изградат како вистински професионалци, рече министерот за образование и наука на Бугарија, проф. д-р Георги В’лчев, на отворањето на академската 2026/2027 година во свечената сала на СУ.

На церемонијата студентите од прва година, победници на национални олимпијади и натпревари и носители на национални дипломи за одличен успех, ги добија своите индекси од ректорката на Софискиот универзитет.

Пред академската свеченост во свечената сала, министерот за образование, ректорското раководство и Академскиот совет на Софискиот универзитет положија цвеќе пред спомениците на донаторите Евлоги и Христо Георгиеви.

Меѓу присутните на отворањето на академската година на Софискиот универзитет беа пратеници, претседателката на Бугарската академија на науките, дописната членка Евелина Славчева, претседателката на Националниот гранков синдикат „Високо образование и наука“ при Конфедерацијата на независните синдикати во Бугарија (КНСБ), проф. Лилјана В’лчева, претседателката на Националната агенција за оценување и акредитација, проф. Марија Нишева-Павлова, ректори, професори, научници и студенти.