Јотова: Благоевград е град на младоста и мост меѓу минатото, сегашноста и иднината

Претседателката на Бугарија, Илијана Јотова на 3 октомври во Благоевград изјави дека градот е важен центар на Југозападна Бугарија и место што ги поврзува минатото, сегашноста и иднината, за време на одбележувањето на 114 години од ослободувањето на Горна Џумаја, денешен Благоевград, јавува БТА.

„Благоевград е град на младоста, град кој прекрасно го пресоздава мостот од минатото кон денешнината и кон иднината“, рече Јотова на официјалното отворање на историската реконструкција „Горнoџумајската улица. Луѓе, куќи, салтанати“.

Во обраќањето таа потсети на настаните по Руско-турската ослободителна војна, кога Берлинскиот договор ги поделил бугарските земји, а Горна Џумаја останала во рамките на Отоманската Империја.

Јотова посочи дека населението на Горна Џумаја речиси три децении не ја прекинало борбата за слобода. Таа се осврна на бунтовите и востанијата, како и на дејноста на учесниците во Македонско-одринското револуционерно движење.

Претседателката потсети дека по улиците на стариот кварт „Вароша“ се движеле дејци на движењето, меѓу кои и Пејо Јаворов, еден од неговите идеолози. Таа се осврна и на неговата поврзаност со Пирин и со борбата за ослободување на Бугарите во Македонија.

Јотова го оцени Благоевград како важен центар на Југозападна Бугарија и како град на младите луѓе. Таа го истакна значењето на двата универзитета и посочи дека градот привлекува млади луѓе кои сакаат со него да ги поврзат својот живот, семејството, професионалниот развој и иднината.

Според неа, Благоевград се претвора во посакуван град во кој младите можат да се образуваат, професионално да се реализираат и да ја изградат својата иднина.

Претседателката рече дека празникот е повод за оддавање почит на луѓето кои ги оставиле домовите и семејствата во името на слободата и татковината. Таа го определи денот истовремено како ден за поклонение и молитва и како повик за „достоинствена, света, слободна и просперитетна Бугарија“.

Пред жителите и гостите на градот се обрати и градоначалникот на Благоевград, Методи Бајкушев, кој потсети како била извојувана слободата на Горна Џумаја и ја нагласи важноста на одговорноста кон сопствената држава.

На официјалното отворање на „Горнoџумајската улица. Луѓе, куќи, салтанати“ присуствуваа и министерката за животна средина и води Росица Карамфилова, областниот управител на Благоевград Васил Трендафилов, претседателката на Општинскиот совет – Благоевград Антоанета Богданова и ректорот на Југозападниот универзитет „Неофит Рилски“, проф. Николај Марин.

Претходно денеска Јотова учествуваше и во „Шествие на сеќавањето“, дел од програмата по повод празникот на градот – 5 октомври, кој годинава се одржува под мотото „Благоевград ја слави слободата“.